Breton 
Français 
Pennad-kaoz gant Lewellyn Loxq-Guinguéno
" Lakaat ul lamm a zo diaes ha reiñ a ra un dalvoudegezh wirion d'ar c'hrogad gouren, ar pezh n'eo ket ken gwir er judo "
Salud dit Lewellyn. Kroget on gant ar gouren e 2006, hag a-viskoaz em eus anavezet ac'hanout evel gourener daoust dit bezañ yaouankoc'h evidon. Da be oad out kroget ? Ganit e oa bet dibabet ar sport-mañ ?Kroget on pa oan 6 bloaz bennak, e 2000 ma ne fazian ket. Gwelet 'm boa un abadenn diskouez, e Banaleg 'gav din. Ma zud o doa goulennet diganin ha plijout a rafe din deskiñ gouren, ha loc'het an traoù evel-se. Kroget on gant Bertrand Le Hellaye, e Kemperle, ha plijet-tre on bet diouzhtu. |
|
Kalz krennarded a baouez gant o sport da vare ar skolaj. Atav 'peus bet c'hoant da genderc'hel ?
Ya. Ne gomprenen ket re perak e paoueze ma mignoned. Ul live propig oamp o tapout. Kroget e oamp abred da genstrivañ asambles ha plijet e oan gant se. Gounezet 'm eus ma zournamant kentañ er Sant-Kadoù, tro 9 pe 10 bloaz.
Petra a blij dit er gouren ?
An eneberezh a blij kalz din. Ar santadurioù pa zeuan a-benn da seveniñ un taol a-feson a zegas joa din ivez. Dreist-holl, mont war-raok ha klask barrekaat atav a sach ac'hanon.
War sportoù all 'out embreget, n'eo ket ?
Ya, pleustret 'm eus judo e-pad bloavezhioù, adalek 16 bloaz. C'hoant 'm boa dizoloiñ ur sport all ha gwelet hag eñ e oa gwelloc'h ar judo, evel ma lâre din tud-zo. En em gavet on eno evit gwelet petra 'oa, plijet on bet ha disoc'hoù ouzhpenn dereat am eus bet, evel un titl a gampion Breizh ar gourizoù gell pe un titl a gampion Frañs ar skolioù-meur, e Reims. Met paouezet on dibaoe. Gwelloc'h eo din doareoù gourdoniñ ar gouren, gwelloc'h evit ar c'horf d’am soñj (pallennoù tevoc'h, muioc'h a aked evit e genseurt). Dieub-kenañ e seblante din bezañ ar judo met strizh-mat eo ar reolennoù e gwirionez, n'eus ket kement-se a frankiz a-benn ar fin. Lakaat ul lamm a zo diaes ha reiñ a ra un dalvoudegezh wirion d'ar c'hrogad gouren, ar pezh n'eo ket ken gwir er judo.
Labourat a rez bremañ evel kelenner sport, e skolajoù Diwan Ar Releg ha Plijidi. Atav 'peus bet c'hoant da labourat e bed ar sport ?Ket tre. Ne oan ket plijet gant an danvezioù-skol boutin, lakaomp. Pa oa bet kaoz deus an heñchañ, sklaer e oa din n’ am boa ket c'hoant d'ober ur vicher azezet a-dreñv d'ur burev. Dre m'on plijet-tre gant ar sport ez on kroget gant studioù STAPS. Pa oan e L3 em eus graet war-dro gourenerien yaouank Skol Bugale Kersanton, en Ospital. Plijet on bet o kelenn a youl-vat.Graet 'm eus ma staj kentañ en ur skolaj d'ar mare-se ivez, e Gwiseni, gant Goulc'hen an Ostiz. Plijet on bet ha kroget on da gelenn er Releg buan a-walc'h goude-se. Evel-just ! Bep bloaz ! Dreist-holl gant re ar 6ved klas met graet 'm eus ivez gant pevareidi a-wechoù. |
|
Gouzout a reont ez out ur gourener ampart ?
Ne lâran ket dezho, met lod a sant buan ez eus ul liamm ouzhpenn etrezon hag ar sport-mañ. Cheñch a ra pep tra evit treuzkas. Kalz aesoc'h eo din desachañ o evezh evit pleustriñ gouren eget evit c'hoari badminton pe me oar... Ma sport eo !
Pennad : Hoel Maleuvre
