Breton 
Français 
Kinnig
Ur sport a reer war-sav hepken eo ar gouren. Ar pal a zo merkañ ul lamm, da lâret eo lakaat e genseurt da gouezhañ war e gein (ar plankennoù-skoaz war al leur).
Spisverkoù
|
Ar c’hourenerien a dab krog e roched egile/eben gant o daouarn, a-us d'ar gouriz (pe er gouriz). Gant o divc’harr e c’hellont klask falc’hat, kaeañ, skubañ pe c’hoazh ober ur c’hliked, da lâret eo puniñ e garr gant hini egile/eben. An tagañ gant an divc’harr a rank chom dalc'hmat dindan live ar gouriz. E-kerzh ur vannadenn e rank an argader teurel evezh da gouezh e genseurt a-benn gwareziñ anezhañ met ivez a-benn uhelaat e chañsoù da verkañ ur poent. Difennet eo ar feulster pa vefe dre gorf (taolioù, krougañ mod pe vod...) pe dre gomz (kunujennoù...). Dinac’h ar c’hrog a zo difennet ivez, ur gourener a rank dalc'hmat argadiñ, enebargadiñ pe leuskel egile/eben argadiñ. |
 |
Al le
Leañ a ra an holl c’hourenerien dirak an dredeoged a-raok stagañ ganti. En em renkañ a reont e div golonnenn. O brec’h dehoù a zo pleget a-geñver o skoaz e-serr ma vez distaget al le, e brezhoneg da gentañ, e galleg da eil.Erfin, briata a reont ar c’henseurt a-dal dezho.
Al le e brezhonegM’hen tou da c’houren gant lealded |
Al le e gallegJe jure de lutter en toute loyauté |
An disoc’hoù (adalek an hini uhelañ)
|
Lamm : ar gwellañ disoc’h er gouren. Reiñ a ra an trec’h diouzhtu, evel an ippon er judo pe ar KO er boks. Kouezh war ar c’hein gant an divskoaz (plankennoù-skoaz) o touch al leur a-raok peurrest ar c’horf pe korf egile/eben. Kostin : disoc’h tostik-tost ouzh al lamm met gant ur plankenn-skoaz hepken o touch al leur a-raok ar peurrest. Kein : disoc’h tost ouzh ar c’hostin, ur c’houezh war traoñ ar c’hein pe war ar c’hein hag ar feskennoù war-an-dro da souer. Netra : kouezh hep disoc’h ebet. |
 |
Ar fazioù
Difennet eo ar feulster mod pe vod. Difennet eo skeiñ gant egile/eben, lakaat gwask war ur c’henvell, krougañ... Un taol gouren mestroniet fall a c’hell bezañ kastizet ma laka egile/eben en dañjer. Difennet groñs eo ivez an disterañ feulster dre gomz, pa vefe ouzh egile/eben pe ouzh un tredeog.
Difennet eo dinac’h ar c’hrogad : n’eus ket da virout ouzh egile/eben da dostaat, o stegnañ an divvrec’h pe o stankañ gant ar penn, o diboulzañ gant an divc’harr pe an divrec’h, pe c’hoazh o chom en un emlakadur difenn e-pad re bell. E-kerzh ur vannadenn, ur gourenera laka an divrec’h war al leur da gentañ evit mirout ouzh ur poent da vezañ merket a vez kastizet.
Diwall : Un evezhiadenn eo traken, hep efed war disoc’h ar c’hrogad. Peurliesañ e vez roet a-raok ma vije roet ur « fazi ».
Fazi : roet e vez da heul ur fazi bennak. Tri « fazi » a zo par d’ur « fazi bras » ha da goll ar c’hrogad.
Poent : roet e vez pa resever un eil fazi. Par eo d’ar c’hostin tamm-pe-damm, met ma vez rampo e vo ar poent just un tammig uheloc’h.
Fazi bras : kollet eo ar c’hrogad pa daper ur fazi bras, da lâret eo 3 fazi.
Divrud : distalvoud deus ar genstrivadeg a-bezh. Roet e vez evit ur fazi grevus pe un emzalc’h dizoujus da vat.
Mont-en-dro ur c’hrogad
|
Pa vez embannet o anv e teu an daou c’hourener war al leur emgann (palenn pe brenn-heskenn diouzh m’eo ar goañv pe an hañv). Ober a ra neuze an dredeoged war o zro : gwiriañ o identelezh ha stad o dilhad, ha reiñ dezho ul lienenn ruz pe wer da lakaat tro-dro d'o ufern a-benn o disheñvelaat. Goulenn a ra neuze an tredeog kreiz « Prest oc'h ? » evit m'en em lakafe an daou c'hourener e kreiz al leur emgann ha ma briatafent a-raok kregiñ. Kregiñ a ra ar c'hrogad pa embann an tredeog kreiz « Krogit ! », ha goude bezañ bet stardet dorn egile/eben. Goude pep kouezh e starder an dorn en-dro, evit diskouez e toujer ouzh al le. Ma erru ar c'hourenerien re dost ouzh bord al leurenn emgann, an dredeoged a embann « E kreiz ». Paouez a rank ar c'hourenerien diouzhtu hag adkregiñ e kreiz al leurenn. |
 |
 |
Ne vern pe tredeog a c'hell paouez ar c'hrogad pa fell dezhañ oc'h embann « Ehan » (evit gourizañ mat ar roched en-dro da skouer). Echuiñ a ra ar c'hrogad kerkent hag embannet « Dibenn » gant an tredeog e-karg eus ar padventer. Ma vez rampo a-fed kostinoù ha poentoù etre ar c'hourenerien e vo un « astenn », goude un troc'hig. E fin an astenn e vez dalc'het kont deus an niver a fazioù ha keinoù merket. Ma vez rampo c'hoazh e vo kemeret un « Diviz ». Pep tredeog a vot, dre guzh eus ar re all, evit ar gourener aet ar maout gantañ/ganti hervezhañ : gwer, ruz pe c'hoazh gwenn (= rampo). Ma ne sav ket a-du war gwer pe ruz daou dredeog da nebeutañ e vo neuze ur mod diwezhañ da zispartiañ ar c'hourenerien : ar « C'houezh ». Ar gourener kentañ da lakaat egile/eben da gouezhañ davet ar c'hein dre un taol gouren a vez trec'h.Echuiñ a ra ar c'hrogad gant kemen anv ar gourener trec'h hag ur vriatadenn etre an daou genseurt. |
